Prishtinë, 17 shkurt - Acari ka sjellë edhe një sfidë për qytetarët. Çmimi i një kubiku dru të zjarrit është rritur. Ai sillet nga 70 deri në 90 euro. Shitësit e druve në kryeqytet i kanë thënë KTV-së jashtë kamerës se çmimi është rritur pasi që edhe fshatarët, nga ata që i marrin drutë, kanë rritur çmimin e kësaj lënde djegëse që te ne përdoret në masë të madhe.

Sipas tyre, çmimi i një metri sillet nga 70 deri në 80 euro. Rritja e çmimit të druve u ka shkaktuar nervozizëm të madh qytetarëve, teksa ndalen për të pyetur për çmimin e tyre. Mirëpo jo gjithkund në Kosovë mund të gjesh kësisoj çmimin. Situatën e ka bërë edhe më të vështirë zvogëlimi i importit të derivateve të naftës që përdoren për ngrohje. Sipas të dhënave të Doganave të Kosovës, mbyllja e pikëkalimit kufitar në Kullë dhe qarkullimi i ulët edhe në pikat e tjera kufitare kanë ndikuar në uljen e importit.